Enstriksyon Egzeyat pou Ensifizans Kadyak

Aktivite

Mande founisè swen sante w la enfòmasyon konsènan yon pwogram egzèsis. Kèk aktivite senp, tankou mache oubyen fè jaden, ka ede w. Fè Egzèsis nan pifò jou nan semèn nan ka fè w santi pi byen. Pa dekouraje si w pwogrese lantman okòmansman. Repoze jan sa nesesè. Kanpe sou aktivite yo si ou gen sentòm tankou doulè nan pwatrin, etoudisman, oswa souf kout. Jwenn aktivite ou renmen. Egzanp sa yo ta ka mache rapid, danse, naje ak fè jaden. Sa yo pral ede w rete aktif epi ranfòse kè w. Mande founisè swen sante w la enfòmasyon sou reyabilitasyon kadyak. Sa a se yon pwogram ki ede w fè egzèsis san danje.

Rejim

Swiv yon rejim alimantè ki sen pou kè w. Epi asire w ou limite sèl (sodyòm) nan rejim ou an. Sèl lakòz kò ou kenbe dlo. Sa fè kè ou travay pi di paske gen plis likid pou kè a ponpe. Limite sèl ou, jan founisè swen sante w la mande w la, lè w fè bagay sa yo:

• Limite manje nan bwat, seche, nan pake, ak fasfoud.

• Pa ajoute sèl nan manje ou.

• Asizonnen manje ak epis olye w mete sèl.

• Veye kantite likid wap bwè. Bwè twòp ka fè ensifizans kadyak la vin pi mal. Pale ak founisè swen sante w la sou konbyen ou ta dwe bwè chak jou.

• Limite kantite alkòl ou bwè. Li ka fè kè w mal. Fanm yo pa ta dwe bwè plis pase 1 vè pa jou. Gason yo pa ta dwe bwè plis pase 2 vè pa jou.

• Mande pou manje ou yo pa gen sèl ajoute lè wap manje deyò.

• Pale ak founisè swen sante w la anvan w sèvi ak ranplasan sèl yo. Yo souvan gen potasyòm nan yo. Sa ka pa bon pou sante ou. Sa a pral depann de ki jan ren ou yo ap byen travay ak ki medikaman w ap pran. Gen kèk moun ki bezwen potasyòm anplis. Gen lòt ki pa bezwen sa.

Tabak

Li enpòtan pou w sispann si w fimen. Fimen ogmante chans ou genyen pou w fè yon kriz kadyak lè li domaje veso sangen ki bay kè ou oksijèn. Sa fè ensifizans kadyak la vin pi mal. Sispann fimen se premye bagay ou ka fè pou amelyore sante w. Enskri nan yon pwogram pou sispann fimen pou w ogmante chans ou genyen pou w reyisi. Pale ak founisè swen sante w la sou medikaman oswa terapi ranplasman nikotin. Mande founisè swen sante w tou enfòmasyon sou gwoup sipò pou w sispann fimen.

Medikaman

Pran medikaman w yo egzateman jan yo preskri w la. Aprann non ak objektif chak medikaman ou yo. Kenbe yon lis medikaman egzat ak dòz aktyèl yo avèk ou tout tan. Pa sote dòz yo. Si ou rate yon dòz medikaman ou, pran li byen vit ou aprè w fin raple w sa. Si ou rate yon dòz epi li preske lè pou pwochen dòz ou a, jis tann epi pran pwochen dòz ou a nan lè nòmal la. Pa pran dòz la de (2) fwa. Si ou pa sèten, rele kabinè doktè ou a. Asire w ou pa melanje medikaman w yo oswa bliye sa pou w pran menm jou a. Renouvle preskripsyon ou yo anvan medikaman yo fini. Pale ak founisè swen sante w lan si w gen pwoblèm ak pri medikaman w yo.

Siveyans pwa

Pran pwa w chak jou. Yon ogmantasyon pwa toudenkou ka vle di ensifizans kadyak ou an ap vin pi mal. Peze tèt ou nan menm lè a chak jou ak menm kalite rad yo. Idealman, peze tèt ou anvan tout bagay lè maten apre ou fin vide blad pipi ou, men anvan ou manje manje maten. Doktè w l ap montre w kòman pou w kontwole pwa w. Yo pral di ou tou lè ou ta dwe rele si ou gen yon ogmantasyon toudenkou, sanzatann nan pwa ou.

An jeneral, founisè swen sante w la ka mande w pou w rapòte si pwa w ogmante plis pase 2 liv nan 1 jou,  5 liv nan 1 semèn, oswa kèlkeswa kantite pwa ou pran an selon sa doktè w te di w. Sa a se yon siy ke w ap kenbe plis likid pase ou ta dwe. Endis pou w wè si w pran pwa gen ladan tcheke cheviy ou pou wè si l anfle, oswa remake si ou gen souf kout lè ou kouche.

Suivi pou swen yo

Pran yon randevou pou suivi jan yo mande sa. Tou depan de kalite ak gravite ensifizans kadyak ou genyen, ou ka bezwen fè suivi nan 7 jou ki vin apre egzeyat ou nan lopital la. Kenbe randevou pou tchèkòp ak tès laboratwa ki nesesè pou tcheke medikaman ou ak kondisyon ou.

Rekonèt ke sante ou epi menm lavi w depann de fason ou swiv konsèy founisè ou a.

Sentom

Ensifizans kadyak ka lakoz yon latriye sentom. Tankou:

• Souf kout

• Difikilte pou w respire lannuit, espesyalman lè w kouche

• Janm ak pye anfle oswa vant anfle (abdomèn)

• Vin fatige fasil

• Batman kè iregilye oswa rapid

• Feblès oswa etoudisman

• Enflamasyon venn nan kou yo

Li enpòtan pou w konnen kisa pou w fè si sentòm yo vin pi mal oswa si ou devlope siy ensifizans kadyak ki pi grav. Siveye jan ou santi ou chak jou. Rapòte nenpòt chanjman bay founisè swen sante w la.

Kilè pou w rele founisè swen sante w la

Rele founisè swen sante w la tousuit si ou gen nenpòt nan siy sa yo ki montre ensifizans kadyak ou a vin pi grav:

• Ou pran pwa toudenkou. Sa vle di si w pran plis pase 2 liv nan 1 jou oswa 5 liv nan 1 semèn, oubyen nenpòt lòt ogmantasyon pwa ke doktè w la ta mande w sinyale.

• Pwoblèm pou w respire ki pa gen rapò ak aktivite fizik

• Nouvo oswa enflamasyon ki vin pi mal nan janm ou oswa cheviy yo

• Vant anfle oswa doulè nan vant

• Difikilte pou w respire lannuit. Sa vle di reveye ak souf kout oswa nesesite pou plis zòrye pou w respire.

• Touse souvan ki pa ale

• Santi plis fatige pase dabitid

Rele 911

Rele 911 tousuit si ou gen:

• Gwo souf kout, nan pwen ou pa ka reprann souf menm pandan w ap repoze

• Gwo doulè nan pwatrin ki pa ale menm lè w repoze w oswa pran nitwogliserin

• Larim wòz epi pwès ak tous epi souf kout

• Yon batman kè rapid oswa iregilye ki kontinyèl

• Pèdi konesans oswa etoudisman

• Sentòm estwòk tankou pèt sansasyon oswa feblès toudenkou sou yon bò nan figi ou, bra, oswa janm ou oswa konfizyon toudenkou, pwoblèm pou w pale oswa chanjman vizyon