Kondisyon Sante Kwonik: Jwe yon wòl Aktif nan Swen ou

Pale ak founisè swen sante w la

Pou w pwofite plis de randevou medikal ou yo, eseye konsèy sa yo:

• Pote yon lis kesyon. Fè yon lis bagay ou vle pale sou yo, tankou nouvo tretman yo. Fè founisè swen sante ou a konnen ou gen kesyon. Ou pa bezwen pè poze yo. Ekri tout sa founisè w la di.

• Kenbe yon dosye pou tout chanjman. Ekri nenpòt chanjman nan kondisyon ou ak nan jan ou santi ou. Pote sa nan randevou medikal ou yo.

• Mande enfòmasyon sou lòt sèvis sante yo. Mande enfòmasyon sou posibilite pou wè lòt founisè tankou dyetetisyen oswa fizyoterapet.

• Mande enfòmasyon konsènan swen konplemantè. Mande si li ka itil pou eseye bagay tankou akiponkti oswa fèy yo.

• Ale ak yon manm fanmi w oswa yon zanmi ou fè konfyans. Moun sa ka ede w konprann epi sonje sa w te tande a. Yo ka pran nòt pou ou tou. Apre ou ka konsantre w sou pale ak founisè a.

Pran medikaman w yo

Aprann konnen medikaman ou pran yo. Pou pi bon rezilta, fè sa ki annapre yo:

• Pale ak famasyen w lan. Mande famasyen ou an si gen kèk manje, remèd fèy, sipleman, oswa medikaman ou pa ta dwe pran pandan w ap pran medikaman ou yo. Sa ka gen ladan medikaman ou achte san preskripsyon, tankou aspirin. Li ka gen ladan tou vitamin ak remèd fèy. Ekri enfòmasyon an.

• Li etikèt yo. Pran medikaman w yo sèlman jan yo di w la. Pa sote dòz yo. Pa ni ogmante ni diminye dòz la. Pale ak founisè swen sante w la anvan w sispann pran kèlkeswa medikaman an.

• Pa pataje medikaman w yo. Pa pataje medikaman oswa pa pran yo nan men yon lòt moun, menmsi se menm medikaman an ak menm dòz la.

• Ou dwe okouran de efè segondè yo. Fè founisè swen sante w la konnen nenpòt efè segondè ou genyen. Gen dwa gen lòt medikaman ou ka eseye.

• Sere medikaman yo kòrèkteman. Gen kèk ladan yo chalè ak limyè ka afekte yo.

• Tcheke pri a. Mande konpayi asirans sante w la enfòmasyon konsènan achte medikaman pa lapòs. Oswa tcheke ak gwoup ki fokis sou pwoblèm ou an. Yo ka konnen lòt fason pou w ekonomize sou depans yo.

• Kenbe yon lis ki aktyalize pou medikaman ou yo. Kenbe lis sa a nan bous ou oswa sou aparèy elektwonik ou. Bay patenè w la oswa yon zanmi lis la. Konsa, ap gen yon bakòp nan ka kote ta gen yon ijans.

Rekonèt santiman ou yo

Lè w ap fè fas ak yon pwoblèm sante, li nòmal pou w tris oswa deprime pafwa. Kèk medikaman ka chanje imè w tou. Men, di yon moun sa si santiman sa yo pa disparèt. Depresyon ka trete.

Si w vle, pataje sa w aprann sou kondisyon w lan ak moun ki nan lavi w la. Reflechi sou mande moun nan fanmi w yo pou yo akonpaye ou nan yon reyinyon gwoup sipò. Aprann konnen plis sou eta w ka diminye enkyetid ou yo. E sa ka pèmèt yo soutni w pi plis.