Kijan Kriz yo Afekte Kò a

Sèvo a ap voye sinyal

Sèvo a ap voye sinyal elektrik nan tout kò a nèt. Chak pati nan sèvo w k ap voye sinyal gen kontwòl yon fonksyon diferan nan kò a. Pa ekzanp, yon pati nan sèvo ou ap kontwole ekilib. Yon lòt pati kontwole langaj. Yon founisè swen sante ka anrejistre sinyal sèvo w yo. Yo itilize yon tès ki rele elektwo-ansefalogram (EEG).

Yon EEG Nòmal.

Sèvo a pandan yon kriz

Pandan yon kriz malkadi, gen sinyal ki pa nòmal ki fèt nan sèvo w. Yo entèwonp aktivite nòmal li. Fason sa afekte kò w depann de 2 faktè prensipal:

• Kote kriz malkadi a fèt nan sèvo w la. Pa ekzanp, yon kriz ki fèt nan yon pati nan sèvo w ki kontwole mouvman (Kòtèks motè a) ka lakòz ponyèt w oubyen janm ou sekwe.

• Jan kriz la ap simaye nan lòt pati nan sèvo a. Yon kriz malkadi ki afekte plis pati nan sèvo w ka afekte plis pati nan kò w.

Tip kriz yo

Tip kriz yo gen ladan yo:

• Kriz fokal yo. Aktivite elektrik ki pa nòmal la kòmanse nan 1 pati nan sèvo a. Yo te konn rele yo kriz pasyèl.

• Kriz Jeneralize. Kriz sa yo kòmanse nan toulède kote nan sèvo a anmenmtan.

• Orijin Enkoni. Yo pa konnen si kriz malkadi a fokal oswa jeneralize. Li ka difisil pou w konnen ki tip kriz li ye jiskaske ou fè kèk tès tankou yon EEG.

• Kriz fokal pou rive nan kriz bilateral. Yon kriz malkadi kòmanse nan 1 kote oswa pati nan sèvo a (fokal). Apresa, li simaye nan toulède kote yo.

EEG yon kriz Pasyèl

EEG yon kriz Jeneralize

Kriz fokal yo

Gen diferan tip kriz fokal. Tip la depann de nenpòt chanjman ki fèt nan konsyans lan. Tankou:

• Konsyans fokal. Moun ki gen kriz malkadi a reveye epi l konsyan. Yo ka pa ka pale pandan kriz malkadi a.

• Twoub konsyans fokal Moun ki gen tip kriz malkadi sa a pèdi konsyans yo pandan yon ti tan tou kout. Tan sa ka kout anpil (kèk segond). Oswa li ka long anpil. Yo te konn rele l kriz pasyèl konplèks.

• Eta Konsyans Enkoni. Yo pa konnen si konsyans moun lan afekte oswa si l pa afekte.

Gen tip kriz fokal tou ki dekri mouvman:

• Kriz fokal motè. Kriz fokal la pwovoke mouvman ki pa nòmal. Tankou kontraksyon, kò k ap tranble oswa yon pati nan kò a ki rèd. Oswa yo ka mouvman tankou niche bouch, fwote men, mache oswa kouri.

• Kriz fokal ki pa motè. Yo pa pwovoke mouvman. Men kriz la ka fè moun lan gen chanjman nan vizyon l, nan panse l oswa nan fason li santi l.

Kriz jeneralize yo

Genyen 2 tip kriz jeneralize:

• Kriz motè jeneralize. Yon kriz malkadi fèt nan toulède kote nan sèvo a. Li pwovoke mouvman tankou pati nan kò ki rèd oswa k ap souke. Yo konn rele l tou yon kriz toniko-klonik.

• Kriz jeneralize yo ki pa motè. Kriz malkadi a ka afekte konsyans. Li pa pwovoke sentom ki gen rapò ak motrisite. Gen kèk moun k ap gen kèk ti mouvman ki repete. Tankou bat je oswa gade yon sèl kote sèlman. Yo rele sa tou yon absans kriz.

Lòt efè kriz yo sou kò yon moun

Aprè yon kriz jeneralize ki te afekte motrisite, ou ka santi mis ou yo ap fè w mal lè w reveye. Gen kèk moun ki konn mòde lang yo pandan yon kriz malkadi. Gen kèk lòt moun menm ki konn pèdi kontwòl blad pipi yo oswa trip yo (enkontinans). Ou ka ap swe epi gen kèk chanjman ki fèt nan koulè po w. Si kriz malkadi a pran w pandan w ap dòmi, sof sa ki ka fè w konnen se lè w santi mis ou yo ap fè w mal lè w reveye. Oswa ou ka jwenn ou te pipi oswa twalèt sou ou pandan w t ap dòmi an.

Kriz malkadi yo ka afekte batman kè w, tansyon w oswa lòt siy vital ou yo tou. Chanjman sa yo la pou yon ti tan (tanporè). Yo amelyore aprè kriz malkadi a fini. Pandan yon kriz malkadi, selil sèvo yo ka andomaje. Souvan sa fèt lè kriz malkadi a long anpil. Pou rezon sa yo, li enpòtan pou w gen bon kontwòl sou kriz yo.

Kriz malkadi ki afekte mouvman oswa konsyans ou ka reprezante yon danje. Lè yon kriz malkadi afekte konsyans ou, ou ka pa kapab konsantre w sou sa w ap fè yo. Ou ka pèdi kontwòl yon machin oswa yon anjen lou.

Kriz ki afekte motrisite yo (jeneralize oswa fokal) ka lakoz ou blese. Lè w gen yon kriz motrisite jeneralize, ou ka tonbe epi ou blese. Mouvman motrisite kriz fokal oswa kriz jeneralize yo kapab lakoz ou blese si ou tou pre yon bagay ki reprezante yon danje tankou yon recho dife oswa yon objè ki file.

Moun ki gen kriz malkadi ki afekte konsyans oswa fonksyon motris yo bezwen pran prekosyon pou yo pa blese. Kapasite pou w kondwi ka afekte. Ou ka pa kapab kondi pou w al lwen. Sa ap depann de avi founisè ou a ak lwa lokal yo. Ou ka pa dwe naje oswa benyen poukont ou. Paske gen risk pou ou nwaye pandan kriz malkadi a. Monte sou bagay ki wo, tankou monte sou yon nechèl, ka lakoz ou blese grav si ou vin gen yon kriz malkadi. Founisè w la ka ede w aprann tout sa w dwe fè pou w rete an sekirite.

Si w konn gen kriz malkadi, toujou mete yon braslè oswa yon chèn alèt medikal. Ou ka vle mache avèk yon lis ki gen medikaman pou kriz malkadi ou yo tou. Li ka sou papye oswa nan telefòn ou. Si twoub ou a pa estab, mete jesyon medikal yo itilize pou trete ijans yo nan lis ou a.